Lïhtsegesiebrie mij säjhta saemien saavremegaahtjemh öörnedh syökemem seedtie SIF´n ståvrose. Syökemisnie edtja tjåadtjodh gusnie jïh gåessie säjhta gaahtjemidie öörnedh.

Gaahtjemh maahta dejnie boelhkine öörnedh:
Daelviegaahtjemh: goevte -voerhtje
Innebandygaahtjemh: rahka- voerhtje
Giesiegaahtjemh: mïetske

Öörnemevierhtieh gååvnese dejtie mah saavremegaahtjemidie öörnieh.
SIF jïh SVL njoelkedassh bïejeme mah edtjieh nuhtjesovvedh gaahtjeminie.
SIF aktem TD´m (tekniske delegaate) veeljie jïh maaksa gie edtja gaahtjemehïeljesne meatan årrodh jïh maahta vaaksjodh gaahtjemh njoelkedassi mietie tjirrehteminie. TD maahta aaj raerieh vedtedh jïh duvtije årrodh öörnemen åvteste.
Nuekies tïjjen gaahtjemi åvteste maahta dispensem syökedh SIF´n ståvroste jis njoelkedassh jallh biehkieh gaahtjemistie mejtie säjhta slyöhpedh. Jis stoerre värhtoedimmieh njoelkedassijste/gaahtjemebiehkijste mejtie siebrie säjhta tjirrehtidh dle SIF´n tjuara dam jaepietjåanghkosne nännoestidh man gaavhtan syökemem dan bïjre tjuara nuekies tïjjen gaahtjemi eannan sïjse båetedh.

SIF naakenh aevsieh jïh aevsiesteerijh utnieh jis daerpies dejtie löönedh jïh åasam maaksa guktie dejtie gaahtjemesäjjan seedtedh. SIF aaj medaljh vadta gaahtjemesuerkide. Dah siebrieh mah saavremegaahtjemidie öörnieh åadtjoeh aaj jeatjah prïjsh vedtedh, bene ij leah nåvreme.
Siebrie mij saavremegaahtjemem öörnie edtja resultaatelästoeh darjodh jïh aaj dejtie lästojde jïh vïhtestimmiem gaahtjemistie seedtedh SIF´se gosse gaahtjemh galkeme.

SSFI´n nedtesäjroe jïh facebookedåehkie maehtieh nuhtjesovvedh juktie bïevnesh saavremegaahtjemi bïjre vuesiehtidh.

Dah saemien saavremegaahtjemh dovne gaahtjemh jïh vihkeles saemien gaavnehsijjieh. Hävvi ij leah nåvreme iehkedsöörnemh utnedh, bene juktie almetjh gellie jeatjah sijjijste vuelkieh dah pruvhkieh tuhtjedh luste jïh buerie jis nimhtie. Guktie ij edtjieh feerh jïjnjh barkoeh sjïdtedh siebrese maahta joe aalkoebarkosne goerehtidh jis jeatja almetjh/sïelth/siebrieh mah maehtieh iehkedsöörnemh jïh beapmoedoekemem utnedh.